تهاني العيد عند الجزائريين

 تهاني العيد عند الجزائريين:

(للترفيه😂😂😂)

الآباء الرائعون:

- حشاهالي ولد الذين، خرج قاع شحم، وكله الموال، وقالي زرع!!

 ‏يرد آخر:

 ‏- شوف آسيدي، انا كبشي فوور ، ضارب غي الزرع

 يرد آخر:

 ‏- مكاش قاع اللي يعرف للكباش كيما أنا، قاع لي خيرتلهم أنا لكباش راهم زاهيين اليوم.

الأمهات الحنونات:

- عيد بلا وليدي قاع ماهوش عيد، ميتاوه للصحراء الكبيدة، البارح عيطلي هو يبكي وأنا نبكي

ترد أخرى:

- جارنا مسكين مدبحش، قسمنا معاه الدوارة، حرام الدراري الصغار يشمو الريحة الصباح.

ترد أخرى:

- حنا قسمنا نص الكبش مع جارتي ولادها يتامى مساكين.

الشبيبة:

- ألو واه، صحا عيدكم، باينة راكم تدبحوا.

يرد الآخر:

- حي عليك، حنا رانا نشوو دروك

يرد آخر:

- أنا والله راني حاصل مالقيتش اللي يدبحلي

يقول آخر:

- أنا السليخة والدبيحة كاملين قعدت دقيقة و30ثانية بالضبط، عاد غبني الحمان 

يرد عليه الآخرون:

- نتا واه لي زوم، نستعرفو بيك، قريب تدخل موسوعة غينيس.

البنات الفراشات:

- حرقت صبعي وانا نشوط فالبوزلوف

ترد أخرى:

- وأنا ظفري تكسر 

ترد الأخرى:

- تأمنوا غلقت نيفي بالمساك باش غسلت الدوارة، يييع حاشا نعمة ربي😁

ترد الأخرى:

- هلكت من التعب، أوف الرجال حاجة مايعاونوش فيها، يعرفو ياكلو برك.

الدراري الصغار(ذكور):

- كبشنا كبير على كبشكم طاكيداير ولا

يرد آخر:

- احنا القرون تاعنا كبار على القرون تاعكم

البنوتات الصغار:

- درت الحنة وتصورت مع الكبش

ترد أخرى:

- أنا بستو بين عينيه

ترد أخرى

- أووو ماخفتيش، أنا البارح قال "بع" بكيت.

#شموسة